台灣光復了兩年，𠊎公過身，其實，𠊎正三歲，還毋知人我（ngin ngò），麼个都毋記得，𠊎公過身个事情全乜等到𠊎較大時，𠊎姆摎𠊎兜兄弟講，𠊎兜正知。𠊎公過身忒三年，𠊎爸續寧過身，該年𠊎六歲，𠊎當記得𠊎爸在生時摎𠊎擎到肩頭頂，五歲前𠊎全無半滴印象。
𠊎公在生時知佢幾時會過身，連哪日哪時都算到準準，過身前佢先去水汴（bàn）頭大塚埔頂看便自家愛下葬个風水跡，風水个座向，先拉好金線，該金線就係老樹放落壙窟（kŏng fud）時个方位用个。幾時會過身、大殮、小殮、家祭、幾時還山，佢都詳詳細細寫好用紅紙袋仔袋好放佇廳下神桌唇个拖箱肚寧。
佢唯一無算準个係佢愛走个「時」，事實上也毋係毋準啦，該日，親戚屋下人做齋燭，佢戴新埔街路，𠊎爸摎𠊎伯去𢯭（tĕn ）手吂轉，愛斷氣時，，目珠一直都無密，屋下人煞煞去街路追𠊎爸摎𠊎伯轉來，來去兩點鐘，堵好一隻時，𠊎爸摎𠊎伯喊句「阿爸」，𠊎公登時目珠就密起來，走忒咧。原來𠊎公死毋聶目，係因為佢一心想愛等到自家个倈仔拚轉來，摎佢送終，見最尾一面，佢正肯聶目啊！
𠊎公會推（cùi）會算个手路，降六個倈仔，全無人學著，無傳下半個就過身，還打爽哪！
【註解】
1. 過身：逝世。
2.毋知人我：不懂人情世故。
3.風水跡：墳地入葬之處。
4.老樹：棺材。
5.壙窟：置放棺材的坑穴。
6.還山：出殯。
7.𢯭手：幫忙。
8.做齋燭：人逝世後做法事的儀式。
9.走忒：過世。
10.死毋聶目：死不瞑目。
11.手路：道術、技能。
